Problemi ta’ Eġakulazzjoni
Hemm 3 tipi ewlenin ta’ problemi ta’ eġakulazzjoni:
- Eġakulazzjoni prematura.
- Eġakulazzjoni mdewma.
- Eġakulazzjoni retrograda.
Eġakulazzjoni prematura
L-eġakulazzjoni prematura hija meta raġel jilħaq l-orgażsmu kmieni wisq, u jista’ jwassal għal tbatija sinifikanti u l-evitar tal-intimità sesswali f’xi każijiet. Dan jista’ jseħħ fi kwalunkwe età tul il-ħajja ta’ raġel. Sal-lum, l-effikaċja kemm tat-terapija medika (eż. ġellijiet anestetiċi lokali, antidepressanti) kif ukoll psikosesswali għadha qed tiġi investigata, iżda r-riżultati preliminari juru li l-eġakulazzjoni prematura tista’ tiġi kkurata b’xi suċċess.
Eġakulazzjoni mdewma
L-eġakulazzjoni mdewma sseħħ meta persuna tipika b’karatteristiċi maskili teħtieġ stimulazzjoni sesswali itwal (bejn 30–60 minuta) biex tilħaq l-orgażmu u l-eġakulazzjoni. Jista’ jkun li ma sseħħ ebda eġakulazzjoni.
Kawżi ta’ dewmien fl-eġakulazzjoni:
- Trawma psikoloġika.
- Dijabete mellitus (normalment tip 1).
- Korrimenti fis-sinsla tad-dahar.
- Sklerożi multipla.
- Kirurġija lill-bużżieqa tal-awrina jew lill-glandola tal-prostata.
- Żieda fl-età.
- Kura (bħal antidepressanti, antipsikotiċi, rilassanti tal-muskoli, mediċini għall-pressjoni għolja tad-demm, u methadone).
Eġakulazzjoni retrograda
L-eġakulazzjoni retrograda hija meta s-semen (il-likwidu tal-isperma) jivvjaġġa lura lejn il-bużżieqa tal-awrina minflok ma jgħaddi mill-uretra. Hija kundizzjoni rari ħafna. Dan jista’ jaffettwa l-fertilità.
Sintomi:
- L-ebda produzzjoni ta’ semen jew ammont żgħir matul l-eġakulazzjoni.
- Awrina mdardra minħabba fluwidu seminali mħallat mal-awrina meta tmur għall-ewwel darba t-toilet wara s-sess.
Il-kawżi tal-eġakulazzjoni retrograda:
- Ħsara lin-nervituri jew lill-muskoli li jduru mal-għonq tal-bużżieqa tal-awrina.
- Kanċer.
- Kirurġija tal-glandola tal-prostata.
- Dijabete mellitus.
- Sklerożi multipla.
- Kura għal pressjoni għolja tad-demm.
Trattament
It-trattament għal problemi ta’ eġakulazzjoni jista’ jvarja, skont il-kawża sottostanti. It-trattament jista’ jinkludi:
- Tibdil fil-mediċini li tkun qed tieħu.
- It-twaqqif jew it-tnaqqis tal-użu tal-alkoħol jew tad-drogi.
- Konsulenza psikoloġika għat-trawma.
Kellem lit-tabib tiegħek għall-gwida u appoġġ.