Pariri għall-iġjene personali:
- Meta tnaddaf il-pene, huwa importanti li tibda mir-ras. Jekk wieħed mhux ċirkonċiż, xorta jkollu bżonn jiġbed l-ħarsa lura kemm jista’ jkun mingħajr ma jikkawża skumdità. Il-ħarsa miġbuda lura tesponi l-glandi li jeħtieġ li tinħasel bil-mod b’ilma fietel. Kun żgur li tnaddaf il-glandi u n-naħa ta’ ġewwa tal-ħarsa għax hawnhekk tifforma sustanza bajda msejħa smegma. Is-smegma tikkonsisti minn ċelluli tal-ġilda mejtin, żjut, fluwidi tal-ġisem u batterji. Il-preżenza ta’ din is-sustanza tista’ tikkawża infezzjonijiet u riħa ħażina.
- Persuni ċirkonċiżi wkoll għandhom bżonn iżommu l-iġjene għax in-nuqqas tal-ħarsa jista’ jikkawża li ras il-pene tiġi f’kuntatt dirett ma’ għaraq u batterji. Huwa importanti li tnaddaf il-ġenitali qabel u wara attività sesswali biex tipprevjeni infezzjonijiet.
- Meta taħsel il-vaġina, tiżvijax b’ħasil qawwi, speċjalment b’likwidi fwejjaħ għax dan jaffettwa l-bilanċ tal-pH tal-vaġina u jista’ jagħmlek aktar suxxettibbli għal infezzjonijiet bħall-Bacterial Vaginosis.
- Xi wħud jagħżlu li jagħmlu douche (jiġifieri jlaħlaħu l-vaġina b’ilma jew betadine) biex inaddfu l-ħruġ vaġinali. Id-douche ineħħi l-batterji tajbin li huma meħtieġa biex iżommu l-pH korrett fil-vaġina. Id-douche wkoll tippredisponi lill-persuna għal infezzjonijiet bħall-Bacterial vaginosis.
- Meta jkollhom il-perjodu, it-tampons u l-pads sanitarji għandhom jinbidlu kull tlieta sa sitt sigħat skont il-fluss mestrwali. Jekk iżżommhom għal żmien twil, dan jista’ jħalli l-batterji jinfirxu u jikkawżaw riħa ħażina u infezzjonijiet. Is-sindromu tax-xokk tossiku (Toxic shock syndrome) huwa kkawżat minn razez tal-batterju Staphylococcus. Huwa kkawżat minn tampons li jintlibsu għal aktar minn sitt sigħat konsekuttivi, mestrwazzjoni, kirurġija jew wara li jkollok tarbija reċentement. Għalkemm m’hemmx test għalih, jiġi djanjostikat permezz tas-sintomi ta’ deni, pressjoni tad-demm baxxa, problemi b’mill-inqas tliet organi u raxx li jdum sa ġimagħtejn. Sintomi oħra jistgħu jinkludu dijarea, uġigħ ta’ ras, tertir, dardir, uġigħ fil-muskoli, għajnejn u gerżuma ħomor, u f’xi każijiet konvulżjonijiet.
- Il-ħwejjeġ u l-underwear mgħarqa wara eżerċizzju għandhom jinbidlu malajr. Infezzjonijiet batteriċi u fungali jirnexxu f’kundizzjonijiet ta’ għaraq. L-għaraq, it-trab u l-qoxra tax-xagħar ġenitali jistgħu jikkawżaw folliculitis, fejn il-follikuli tax-xagħar jinfjammaw u jiġu infettati.
- Qatt tiddewwem tmur il-kamra tal-banju biex tgħaddi l-awrina, speċjalment qabel ikollok sess. Li tgħaddi l-awrina tikkawża li l-bużżieqa tal-awrina tiegħek teħles mill-batterji u t-tossini li jirnexxu fit-trakt urinarju. Id-dewmien fl-awrina jaċċellera t-trobbija tal-batterji li jwassal għal infezzjonijiet. Bużżieqa mimlija awrina tagħmel l-uretra tiegħek suxxettibbli għal infezzjoni mill-vaġina jew mill-pene tiegħek.
- Tilbesx underwear issikkat jew ġinsijiet issikkati għal żmien twil. Agħżel drappijiet naturali bħall-qoton minflok sintetiċi għall-ilbies ta’ taħt tiegħek.
- Huwa wkoll importanti ħafna li tnaddaf sew l-anus tiegħek, speċjalment meta jkollok sess anali.
- Sess anali mingħajr kondom jista’ wkoll ixerred infezzjonijiet oħra, bħal Escherichia coli (E. coli), salmonella, u giardiasis. It-tindif qabel u wara s-sess anali ma jipprevjenix it-tixrid ta’ infezzjonijiet trasmessi sesswalment (STIs). Madankollu, jista’ jnaqqas iċ-ċans li wieħed jieħu batterji, viruses jew parassiti bħal dawn.
