X’inhi l-PEP?
PEP tfisser Post-Exposure Prophylaxis (Profilassi wara l-Esponiment). Hija kura ta’ żmien qasir b’mediċini kontra l-HIV li tittieħed wara esponiment possibbli sabiex jitnaqqas ir-riskju li persuna tinqabad bl-HIV.
Meta nista’ nitlob PEP?
Il-bidu tal-PEPSE huwa rakkomandat kemm jista’ jkun malajr wara l-espożizzjoni, preferibbilment fi żmien 24 siegħa mill-espożizzjoni iżda tista’ tingħata sa 72 siegħa wara. Madankollu, iktar ma tkun kmieni, aħjar; iktar ma jkun hemm dewmien, inqas ikun hemm ċans li l-PEP taħdem.
Id-deċiżjoni li tinbeda l-PEP tittieħed fuq bażi ta’ każ b’każ. Ċerti fatturi jistgħu jżidu r-riskju ta’ trażmissjoni tal-HIV u jridu jiġu kkunsidrati u diskussi waqt konsultazzjoni. Demm, sekrezzjonijiet ġenitali u fluwidi tal-ġisem mdemmija jżidu r-riskju ta’ trażmissjoni. Il-PEP hija rakkomandata aktar faċilment f’każijiet ta’ aggressjoni sesswali, partikolarment jekk l-aggressur ikun minn grupp b’prevalenza għolja. Ukoll, wara evalwazzjoni bir-reqqa, professjonisti tal-kura tas-saħħa għandhom dritt għall-PEP f’korriment b’labra minn sors potenzjali tal-HIV.
F’xiex tikkonsisti?
Dan jinvolvi l-użu ta’ mediċini b’effetti sekondarji potenzjalment serji. Għalhekk, huwa rakkomandat li l-individwi kollha fil-bżonn tal-PEP jiġu mħeġġa bil-qawwi jiltaqgħu ma’ professjonist tal-kura tas-saħħa xieraq speċjalizzat fis-saħħa sesswali biex jiddiskutu t-tnaqqis tar-riskju.
Qabel ma tingħata l-PEP, huma meħtieġa test tal-HIV u testijiet għall-infezzjonijiet trasmessi sesswalment (STI). It-test tal-HIV jindika l-infezzjoni 4 ġimgħat wara l-espożizzjoni. Dan it-test huwa importanti għax infezzjoni preċedenti se tiddetermina liema tip ta’ trattament għandek bżonn. Testijiet regolari oħra huma wkoll rakkomandati inkluż test tat-tqala fin-nisa. It-tqala m’għandhiex tbiddel id-deċiżjoni li tinbeda l-PEP iżda trid tittieħed in konsiderazzjoni meta tagħżel il-mediċina xierqa. Il-PEP mhijiex liċenzjata matul it-tqala u wieħed għandu jikkunsidra r-riskju u l-benefiċċji tat-trattament bir-reqqa.
Test tal-HIV imbagħad jittieħed wara 28 jum meta jitlesta t-trattament. Test ieħor tal-HIV u testijiet oħra ta’ skrinjar għall-STIs se jittieħdu wkoll wara 8 ġimgħat sa 12-il ġimgħa mill-aħħar espożizzjoni sesswali tiegħek, qabel ma tibda l-PEP.
Il-PEPSE hija metodu ta’ emerġenza għall-prevenzjoni tal-HIV u m’għandhiex titqies jew tiġi mħeġġa bħala rimedju tal-ewwel istanza. Kors ta’ trattament ta’ 28 jum jiswa madwar €600, iżda jista’ jkun aktar għali fil-każ ta’ mediċini b’isem tad-ditta.
Huwa ssuġġerit li individwi li jfittxu l-PEPSE għandhom jattendu għal check-ups regolari tas-saħħa sesswali fil-futur.
X’inhuma l-effetti sekondarji?
L-effetti sekondarji ewlenin huma sintomi gastro-intestinali (dardir, rimettar, uġigħ fl-addome u dijarea), sintomi tal-apparat respiratorju (sogħla, sintomi nażali, deni, sogħla u għeja), uġigħ ta’ ras u sturdament, fost oħrajn.
Fejn nista’ mmur għall-PEP?
Il-PEP tista’ tiġi preskritta fil-GU clinic waqt il-ħinijiet tax-xogħol. Ċempel il-GU clinic fuq 25457494/1 għal parir u appuntament urġenti matul il-ġimgħa. Tista’ taċċessa l-PEP ukoll fid-dipartiment tal-Accident and Emergency (A&E) barra mill-ħinijiet tal-uffiċċju. F’dan il-każ, se tingħata riċetta għat-trattament u tikketta ta’ riferiment għal żjara fil-GU clinic il-ġurnata tax-xogħol li jmiss.