X’inhi l-Vaġinosi Batterika (bacterial)?
Il-Vaġinosi Batterika hija tip ta’ infjammazzjoni vaġinali kkawżata minn kwantità kbira ta’ ċerti batterji. Tiġi meta jitħarbat il-bilanċ bejn il-batterji “tajbin” u “ħżiena”.
Kif teħodha l-Vaġinosi Batterika?
Mhijiex magħrufa l-kawża preċiża tal-Vaġinosi Batterika (bacterial). Madankollu, hemm fatturi ta’ riskju li jistgħu jwasslu għall-iżvilupp tal-marda. Dawn jinkludu:
- Jekk tkun sesswalment attiva.
- Jekk għandek partner sesswali ġdid.
- Jekk għandek bosta partners sesswali.
- It-tbaħbiħ (douching). It-tbaħbiħ tal-vaġina bl-ilma jew bis-sapun jista’ jħarbat il-bilanċ naturali tal-batterji fil-vaġina. Dan jista’ jwassal għal żieda fil-batterji anerobiċi u jikkawża l-vaġinosi batterika. Il-vaġina tnaddaf lilha nfisha u m’hemmx bżonn tinħasel.
- Nuqqas naturali ta’ batterji laktobaċilli. Hemm iktar ċans li tiżviluppa l-vaġinosi batterika jekk ma jkollox biżżejjed “batterji tajba (good bacteria)” protettivi bħal-laktobaċilli (lactobacilli).
- Is-sess orali.
- It-tipjip.
- Jekk ġa għandek STI.
- Il-Vaġinosi Batterika ma tistax tittieħed mill-pixxini, is-sedili tat-toilet jew mill-friex.
- Madwar 50% tan-nisa ma jkollhomx sintomi.
Kif nista’ nnaqqas ir-riskju li niżviluppa l-Vaġinosi Batterika?
- Ma tagħmilx sess.
- Tnaqqas in-numru ta’ partners sesswali.
- Tevita t-tbaħbiħ tal-vaġina.
- Tuża sew kondoms tal-latex.
Sintomi:
Madankollu, jekk IKOLLOK is-sintomi, dawn jistgħu jinkludu:
- Vaġina li jkollha riħa ħażina mhux tas-soltu – li spiss tiġi deskritta bħala “riħa ta’ ħut”. Din ir-riħa tkun partikularment prominenti wara s-sess.
- Tisfija vaġinali li tkun griża jew bajda b’konsistenza rqiqa.
- Ħakk madwar in-naħa ta’ barra tal-vaġina.
- Ħruq meta tgħaddi l-awrina.
Kif tiġi ttrattata l-Vaġinosi Batterika?
Il-Vaġinosi Batterika xi kultant tista’ tgħaddilek mingħajr trattament. Madankollu, jekk għandek is-sintomi, importanti żżur il-ġinekologu tiegħek biex tingħata trattament għal din il-kundizzjoni.
Spiss jintużaw l-antibijotiċi biex jittrattaw il-vaġinosi batterika. It-trattament jista’ jnaqqas li jkollok STIs oħra. Il-Vaġinosi Batterika tista’ terġa’ tfeġġ wara t-trattament. Il-partners sesswali rġiel ġeneralment ma jkunux jeħtieġu trattament.
It-trattament huwa indikat speċjalment għal min ikollu s-sintomi, ikun se jagħmel xi operazzjoni, jew bi tqala.
X’inhuma l-kumplikazzjonijiet tal-Vaġinosi Batterika?
- Nisa tqal li jkollhom il-vaġinosi batterika għandhom aktar probabbiltà li jkollhom tfal li jitwieldu qabel iż-żmien jew b’piż baxx mat-twelid.
- Il-preżenza tal-vaġinosi batterika żżidlek ir-riskju ta’ infezzjonijiet trażmessi sesswalment bħall-HIV, l-HSV, il-klamidja u l-gonorrea. Il-Vaġinosi Batterika żżid ukoll iċ-ċansijiet li tgħaddi STIs bħall-HIV lill-partner tiegħek.
- Riskju ta’ infezzjoni wara operazzjoni ġinekoloġika – Meta jkollok il-Vaġinosi Batterika, ikun hemm aktar ċans ta’ żvilupp ta’ infezzjonijiet wara operazzjonijiet bħal isterektomija.
- Marda infjammatorja pelvika (PID). Il-Vaġinosi Batterika tista’ xi drabi twassal għall-PID. Il-PID hija infezzjoni tal-ġuf li tista’ twassal għall-problemi ta’ fertilità.
Referenzi:
https://www.cdc.gov/std/bv/STDFact-Bacterial-Vaginosis.htm
https://pubmed.ncbi.nlm.nih.gov/31901667/